«أول مرة أقولها».. تعليق عمرو أديب على خسارة الزمالك بدوري الأبطال (فيديو)

حرص الإعلامي عمرو أديب، على توجيه رسالة ساخرة بعد هزيمة الزمالك من الوداد المغربي ضمن دور المجموعات بدوري أبطال أفريقيا، بنتيجة 1/0.

حيث أكد عمرو أديب خلال برنامج “الحكاية” المذاع على قناة”إم بي سي مصر” قائلًا: “أنتوا عارفين إن أنا زملكاوي وبدفع ثمن انتمائي ده لحد دلوقتِ، ومهما كان الوضع كنت بقول الزمالك هياخد بطولة الدوري وأفريقيا وكنت براهن على كدا ولكن السنة دي أنا بأكد لكم الزمالك مش هياخد حاجة خالص وبقول لكم من بدري أهو لا دوري ولا كأس ولا بطولة أفريقيا”.

وأضاف: “الوضع اللي الزمالك فيه دلوقتِ غريب وعجيب النادي دا وقت لما ما كانش لاقي ياكل ومفيش مجلس إدارة خد الدوري وعندما استقر النادي وبقى فيه فلوس زي ما قالوا لنا الهزايم تتوالى”.

ليس البلدي.. ما «البيض الأورجانيك» وسعره الذي تحدث عنه عمرو أديب؟

وتابع: “الزمالك فيه دايرة ما بتخلصش من 20 أو 25 سنة على حالة اصل فيه أزمات في النادي بنبني من أول وجديد ولم ننته، كل شوية نغير فريق، والنهاردة مشوا نص اللاعيبة، كان الزمالك ملكي وملعلع بنفس اللاعيبة اللي كانت بتلعب النهارده، والنهارده يقولك النادي محتاج وقفة، طيب والأندية التانية مش محتاجة وقفة ليه، هيفضل الزمالك في دايرة الزمالك محتاج وقفة ولازم نغير الفريق، طب وبعدين وآخرتها ايه، دا احنا شوفنا الأهلي في أسوأ مراحله وهو بيغير فريق كامل كان مشكلته موسم واحد النهاردة عنده فريق بالملايين وفريقه طاير، دلوقتي بقولكم الزمالك لا هياخد دوري ولا كأس ولا أفريقيا وأشك إنه يحافظ على المركز الثاني في الدوري لأننا قررنا نفك الفريق ونركبه تاني ودي فيها سنتين تلاتة وربنا معانا”.