شاهد.. زوج ابنة نجلاء فتحي يكشف سر حمله لحذائها

أثار المخرج خضر محمد خضر، زوج ابنة الفنانة القدير نجلاء فتحي، الجدل منذ أيام بعد أن تم تداول صورة له رفقة زوجته ياسمين خلال تواجدهما في فعاليات مهرجان الجونة السينمائي.

وظهر خضر في الصورة وهو يحمل حذاء زوجته، ليتسبب في انقسام الجمهور على مواقع التواصل الاجتماعي ما بين مؤيد لهذا التصرف الذي قام به ومعارض.

واعتبر المؤيدون لهذا التصرف أنه معنى حقيقي للرومانسية بين الزوجين، أما المنتقدين فقد اعتبروه محاولة للفت الانتباه وتسليط الضوء نحوهما.

كل ما أثير خلال الساعات الماضية، جعل المخرج خضر محمد خضر بطل هذه الواقعة يحاول توضيح الأمر، من خلال منشور عبر حسابه على فيس بوك.

وكتب زوج ابنة نجلاء فتحي ” بالنسبة للصورة بتاعتي أنا ومراتي، الصورة دي اتاخدت واحنا مروحين الساعة واحدة ونصف صباحا من حفل الافتتاح (مش واحنا داخلين حفل الافتتاح) أكيد مش هدخل حفلة شايل جزمة مراتي وماشي!..ط.

وأضاف ” احنا الدعوات بتاعتنا دعوات VIP مش دعوات مشاهير، وده أصلا ما بيدخلناش على السجادة الحمراء مع الفنانين، ده بيدخلنا من باب تاني جنبه مفيهوش كاميرات”.

https://www.facebook.com/kheidro/posts/10159202571606122

وتابع خضر ” كل ما هناك ان بعد ٦ ساعات من الحفل، واحنا خارجين باب الخروج كان زحمة وكل الناس خارجه منه (فنانين وغير فنانين ومصورين وكاميرات فيديو).. ومراتي اكيد بعد ٦ ساعات رجلها تعبت زي اي واحدة رجلها بتتعب في اي فرح.. فا قلعت الجزمة! فا من الطبيعي ومن الرجولة ومن الأدب ان انا اللي انزل اجيب الجزمة (مش هخلي مراتي توطي وسط الناس اكيد.. ) وديه لا حاجة تعييني ولا تقلل مني.. واحدة شايلة بيتي على راسها ١٥ سنة، مش هاشيل جزمتها ١٥ دقيقة؟”.

واستطرد خضر ” المهم ضربت بعيني لقيت ممر السجادة الحمرا مفتوح وفاضي قولت لها ياللا نخرج من هنا اسرع، ولقينا المصور العزيز محمد حامد بيطلب مننا صورة فا وقفنا ٣ ثواني بالظبط.. ابتسمنا واخدنا الصورة وخلعنا.. والراجل تفضل مشكوراً وبعت لي الصورة على الفيسبوك وبصراحة الصورة لذيذة.. ولما حطيتها عندي على الوول لقيتها بيتعمل لها شير روحت قافلها (للاصدقاء فقط) بس كدة”.

وكشف المخرج خضر محمد خضر عن سبب ظهوره في فعاليات المهرجان بعد مرور عامين على انتهاء الأزمة التي وقعت بينه وبين القائمين على المهرجان ” الناس اللي بتسأل انا ازاي في المهرجان بعد المشاكل (أنا بفضل ربِنَا وبفضل دعواتكم) اعلنا السنة اللي فاتت والجرايد كتبت وانا كتبت وأحد المنظمين طلعت في التلفزيون وقالت عملنا عقد تصالح مع محمد خضر خلاص واخد حقوقه وبقى ضيف شرف المهرجان كل سنة والسنة ديه اسمها سنة الصلح خير.. وديه تاني سنة ليا في المهرجان كا ضيف شرف أنا ومراتي”.

وتابع ” شكرت عندي عالفيسبوك كل الناس اللي وقفوا جنبي و تمنياتي بالتوفيق لمهرجان الجونة
(تفاصيل عقود التصالح) اللي بيفهم في القانون او يعرف حد بيفهم في القانون يسأله وهايقوله ان تفاصيل اي عقد تصالح بتبقى سرية للغاية وبيحظر النشر او الادلاء بها والا يطبق شروط جزائية ومبالغ طائلة على من يخالف ذلك.. انما اللي مفهوم من الصورة الكبيرة اني اخدت حقوقي خلاص و كمان بقيت ضيف شرف في المهرجان كل سنة”.

وأتم “بالمناسبة المهرجان لذيذ قوي السنة ديه وفيه افلام جامدة جداً وندوات اجمد واجمد ياللا اشوفكم لما نرجع ان شاء الله، حضن كبير وبوسة كبيرة ليكم كلكم”.

جدير بالذكر أن ياسمين أبو النجا زوجة خضر محمد خضر هي ابنة نجلاء فتحي الوحيدة من زوجها الأول سيف أبو النجا الشقيق الأكبر للفنان خالد أبو النجا.