أصعب من ألم الولادة.. نشوى مصطفى تحذر المصريين من كورونا
بعد تماثلها للشفاء من فيروس كورونا وجهت الفنانة نشوى مصطفى، رسالة إلى الشعب المصري، محذرة فيها من الفيروس.
نشوى مصطفى، قالت في مداخلة هاتفية مع برنامج كلمة أخيرة على قناة ON،: أبوس إيديكم لو بتحبوا ربنا وبتحبوا ولادكم إتقوا شر الألم اللي أنا حسيت بيه، حافظوا على نفسكم علشان ولادكم وأكل عيشكم.. كلنا على باب الله.
وأضافت: كلنا على باب الله وماشيين بالأرزاق.. عشان أكل عيش ولادكم مش هينفع لو إنت عامل أو صنايعي ترقد.. حافظ على نفسك أرجوك بالكمامة، كمامة تمنها 3 جنيه هتحافظ عليكم وهتخليك لبيتك وأولادك.
وتابعت: أنا كان معايا فلوس بس مفيش مستشفى كانت عاوزة تقبلني من المستشفيات الخاصة، لكن مستشفى بلدي العامة الحكومية قبلتني، أنا عندي فلوس وربنا ساترني، بس مكنتش بقدر أحط في بقي لقمة.. الفلوس مش مهمة لما تبقى معاكي ومفيش مستشفى راضية تقبلك أو قادرة تاكلي حتى.. الصحة ياجماعة أهم من أي حاجة في الدنيا، والنبي ماتستهونوا، كورونا دي صعبة جدًا أصعب من ألم الولادة.
وقالت: أنا أهملت واتكسفت من لبس الكمامة وماتسلموش على حد بإيديكم، وحافظوا على التهوية والتباعد والتغذية، كلوا برتقال وجرجير أو جوافة وجبنة قريش دي نصايح الدكتور حافظوا عليها، عندنا الحاجات دي رخيصة، إحموا نفسكم مع الكمامة.